KON. ZALSOS MIPAHIGAYON OG LEGISLATIVE INQUIRY KUNG LUWAS UG MAAYO’NG PUY-AN ANG MIRADOR HOUSING

DATE : Mar 15, 2023
Author • Asenso News Iligan City

Buot sigurohun sa Lokal nga Kagamhanan nga luwas ug angayan na nga puy-an ang Mirador Ecoland Residences sa Barangay Tipanoy sa dili pa dawaton ni Mayor Frederick Siao ang nahuman nga mga balay sa National Housing Authority (NHA).

Panahon pa sa kanhi administrasyon nahuman ang 52 ka-balay sa NHA. Apan dihang gi-inspeksyon ang Ecoland ‘ning bag-o, guba ang dalan, walay tubig sa dapit ug walay mitigating measures aron mapaubsan ang risgo sa landslide. 

Nasayran ni Konsehal Betsy Maria Zalsos, ang Chair sa Committee on Land Use, Housing and Urban Poor, gikan sa Mines and Geosciences Bureau (MGB) nga ga-bahaon ang creek sa dapit. Dako ‘sab ang posibilidad sa landslide sa Mirador base sa Landslide Susceptibility Map sa MGB. Gawas niini, posibleng matay-og ang yuta tungod duol kini sa Lanao Fault System.

 “Shall we risk their lives for something that has already been paid nga highly susceptible to landslide considering wala man tay mitigating measures nga nabutang didto. Maayo unta naa tay slope protection. Ni back- out ang contractor, so wala nahimo,” sumala ni Zalsos.

Mopahigayon og ika-duha nga legislative inquiry si Zalsos labot sa proyekto umaabot nga mga adlaw. Apil sa gusto niya masayran kung pilay magasto sa LGU kung magpahimo og saktong kalsada riprap , slope protection ug drainage aron mahimong luwas sa landslide ang mga mamuyo dinhi. Ingon man kung angayan ba nga ipdayon ang Phase I sa proyekto diin ang LGU ang mi-implementar. Sukad gisugdan ang Phase I sa niaging asministrasyon, “skeletal” pa gihapon ang mga unit niini.



[Ronnie Enderes/CIO]

We would like to hear from you

Send us your feedback, comments and suggestions to help improve our services

Iligan City