DATE : Feb 03, 2026

Gisusi pagbalik sa City Planning and Development Office, City Administrator, City Mayor’s Office ug ubang mga opisina sa LGU-Iligan ang 15 Iligan Development Goals (IDGs) sa gihimong workshop kagahapon. 

Gihisgutan ang mga success indicators ug mga gaps sa pag-implementar niini.

"Ang Iligan Development Goals is very important. This is a commitment of the City Government particularly on how to cascade or localize sa Sustainable Development Goals," matud ni EnP Elsa Maquiling sa City Planning and Development Office.

Ang kolektibo nga kahanas sa matag departamento, datos ug sektoral nga mga panglantaw, kritikal sa pagsiguro nga ang mahimong Comprehensive Development Plan tukma nga nagpakita sa mga prayoridad sa kalamboan sa siyudad ug epektibong nagtubag sa kasamtangang mitumaw nga mga hagit.

" As part of the updating of our Comprehensive Development Plan, this activity brings together the results of our sectoral workshops covering social, economic, infrastructure, enviroment and institutional sectors and cross cutting concerns, " pahayag ni Jules Verne Padilla , Chief of Staff  sa buhatan ni Mayor Frederick Siao.

" Atong i-review ni so that for the next 3 years kabalo ta what we plan to achieve, what we want to target, kabalo ta altogether kini nga IDG mao ni atong trabahuon," dugang sab ni City Administrator Darwin Manubag

Sa  gihimong pagreview o pagsusi sa 15  Iligan Development Goals gisusi sab kung haum ba ang titulo sa mga IDGs.

Dunay mga focus questions sa matag sektor atol sa workshop ,  kung haum pa ba ang  titulo sa Social IDG o ang  katuyoan ba niini labing mahinungdanon nga isyu sa katilingban sa panglawas, edukasyon , pabalay,  social protection ug gender equality.

Sa Economic IDG, kung nakuha ba ang katuyuan  sa   panarbaho, productivity, innovation ug inklusibo nga pagtubo sa ekonomiya, ug uban pang mga pangutana ngadto  sa tanang sektor.

Ang mga nahimong tubag sa mga partisipante, i-presentar sa  laing tulo ka adlaw nga workshop nga nagtumong o magsilbing estratehikong plataporma alang sa pagkonsolida ingon man  paghi-usa sa sektoral nga mga isyu, prayoridad ug estratehiya ngadto sa usa ka hiniusang Comprehensive Development Plan nga maoy mogiya sa medium-term development agenda sa siyudad.

Magtutok sab kini sa pagporma ug pagrefine  sa panan-awon, mga tumong, programa ug prayoridad nga proyekto sa siyudad nga magseguro  nga naka-align sa nasudnon ug rehiyonal nga development framework ingon man sa Sustainable Development Goals o SDGs.

 Ronnie Enderes