DATE : Feb 03, 2026

Gipahigayon sa Iligan City Disaster Risk Reduction and Management Office, DOST-PAGASA, mga Barangay ug Philippine Coast Guard-Lanao del Norte, City Social Welfare and Developemtn, ug Department of the Interior and Local Government ang Pre-Disaster Risk Assessment (PDRA). Kini isip pagpangandam sa Tropical Depression Basyang nga gilauman nga mabati sa Visayas, Northern Caraga ug Northern Mindanao sa Myerkules sa hapon o gabii, ug labing kusog nga epekto niini sa adlawng Huwebes.

Ang miting gipangulohan ni Armien Alorro, ang Head sa ICDRMMO.

Sumala kang Michael Demecillo, ang Weather Specialist sa PAGASA, posibleng masinati sa Northern Mindanao ug Iligan City ang mapanganuron nga kalangitan, katag-katag nga pag-ulan ug pagpanalugdog tungod sa trough o “ikog” sa Tropical Depression Basyang. Dugang niya, mas mabati ang epekto sa bagyo samtang magkaduol kini. 

Sumala ni Demecillo, anaa sa 55 ngadto sa 70 Kilometers per hour ang gikusgon sa dagan sa bagyo sa pagka-karun. Northwestward ang dereksyon niini. 

Gipahimangno-an sa PAGASA ang ICDRRMO ug mga barangay sa posibleng landslide ug pagbaha.

Samtang nag-abiso sab ang Philippine Coastguard sa mga mananagat nga dili una managat ilabi na nga gilauman ang pagtaub sa gabii. Ang mga cargo ships usab pwedeng mo-ankorahe o motago sa sa Kiwalan sa Huwebes.

Nag-skedyul na sab ang mga barangay sa coastal areas nga magpahigayon og Barangay DRRM Council Meeting.

Gi-andam na sab ang mga rekurso sa ICDRRMO alang sa response. 

Tugon ni Mayor Frederick Siao sa ICDRRMO, mga ahensya sa gobyerno, ug mga barangay nga magpabiling abtik.