MGA TAG-IYA OG IRO MULTAHAN KUNG DILI MAKAPA-REHISTRO, BAKUNA KONTRA RABIES SA ILANG HAYOP

DATE : Mar 11, 2023
Author • Asenso News Iligan City

MGA TAG-IYA OG IRO MULTAHAN KUNG DILI MAKAPA-REHISTRO, BAKUNA KONTRA RABIES SA ILANG HAYOP 
Gi-awhag sa Iligan City Veterenarian’s Office (ICVO) ang mga nanag-iya og mga iro ug iring nga pabakunahan ilang mga hayop kontra rabies.
Ang rabies usa ka viral disease nga pwede’ng mapasa ngadto sa ubang hayop o sa tawo kung makapaak ang rabid nga iro o iring. Maka-apekto kini sa utok ug makamatay. Sa Anti-Rabies Act of 2007, gi-mando sa mga tag-iya nga ipa-rehistro sa ICVO  ang mga iro ug iring, paghikot niini o dili buhi-an, regular nga pabakunahan kontra rabies ang mga hayop, i-report sulod sa 24 oras kung makapaak ang hayop aron ma-obserbaran kini, ug mo-tabang ingon man maoy mo-gasto sa pagpabakuna o pagpatambal sa napaakan. 
Multahan og P25,000 ang tag-iya nga dili mo-gasto sa pagpatambal. Samtang, multahan ‘sab og P2,000 ang mga tag-iya nga wala mi-parehistro sa ilang hayop. 
Dunay bayad nga P100 alang sa bakuna sa hayop. Sumala kang Dr. Maria Dahlia Valera, ang Department Head sa ICVO, ga-panakop ‘sab sila og mga la-aw aron dili kini makapaak.
Ang ICVO anaa sa sulod sa Tambo Terminal. Bukas ilang buhatan Lunes hangtud Byernes, alas 8:00 sa buntag hangtud alas 5:00 sa hapon. Mamahimo ‘sab sila nga tawagan sa numero 221-6752.
Ang Marso gideklara nga Rabies Awareness Month.
[Jesie Chris Quinabato/CIO]

We would like to hear from you

Send us your feedback, comments and suggestions to help improve our services

Iligan City