ORDINANSA GA-MANDO PAG-INSTALAR OG CCTV SA GAGMAY NGA ESTABLISYAMENTO, GIDUSO

DATE : Mar 11, 2023
Author • Asenso News Iligan City

ORDINANSA GA-MANDO PAG-INSTALAR OG CCTV SA GAGMAY NGA ESTABLISYAMENTO, GIDUSO
Mi-duso si Konsehal Atty. Providencio Abragan Jr., ang Chairman sa Committee on Peace and Order, og ordinansa nga mag-butang og CCTV ang mga establisyamento nga dunay P100,000 nga puhonan pataas. Sa daan nga ordinansa, ang mga establisyamento lang nga dunay P500,000 nga puhonan ang gimando-an nga magbutang og CCTV.
Apan nakita sa Lokal nga Kagamhanan ug mga pulis nga mas daghan ang mga negosyo nga ma-protektahan sa krimen kung mas daghan ang dunay CCTV tungod matahap ang mga dautan. 
Makatabang ‘sab kini sa imbestigasyon sa mga krimen nga mahitabo sulod ug duol sa establisyamento.
Sa ordinansa, gi-mando nga tin-aw ang kuha nga video sa CCTV. Gi-mando nga i-preserbar ang video sa labing dugay 30 ka-adlaw. Gi-mando usab nga mohatag ang estalisyamento og kopya sa footage ngadto sa mga otoridad kung kinahanglanon. Mo-inspeksyon ang mga pulis, Punong Barangay, Permits and License Division, Iligan Chamber of Commerce ug Information and Communication Technology Center.
Mo-pahigayon pa og mga public hearing ug tuki-on sa konseho ang gisugyot nga ordinasa. 
[Jesie Chris Quinabato/ CIO]

We would like to hear from you

Send us your feedback, comments and suggestions to help improve our services

Iligan City