DATE : Mar 14, 2023

DUGANG PABALAY SA MGA SENDONG SURVIVORS, TUKURON SA MANDULOG

Sugdan og tukod ang 100 ka-units sa Abril karung tuiga. Sulod sa GMA Kapuso Village sa Barangay Mandulog tukuron ang mga balay.

Kahinumduman nga dunay nahabilin nga 156 Million Pesos nga Core Shelter Assistance gikan sa Department of Social Welfare and Development(DSWD). Gihatag kini sa panahon ni kanhi-Mayor Lawrence Cruz apan wala magamit ang tibuok kantidad. Mihangyo lang si Mayor Frederick Siao sa DSWD nga dili bawion ang nahabilin sa pundo aron mapahimuslan sa wala pa maka-balay nga mga survivors.

Sumala sa Housing and Resettlement Office (HRO), kato lang mga survivors nga nakarehistro sa DSWD ang pwedeng maka-avail niini.

Duna nay singkwenta’y nuebe ka mga nakalingkawas sa bagyong Sendong nga una’ng makabenipisyo sa housing project. 

Prayoridad nga hatagan og balay silang mga wala pa kapahimulos sa housing program sa gobyerno, mga renters, sharers ug namuyo sa danger zone.

Mi-himo og deliberasyon ug aktwal nga pagsusi ang Beneficiary Selection and Awards Committee (BSAAC) sa kahimtang sa mga survivors aron ma-una ang wala pay permanente nga balay.

[Florita Mae Cagula/ CIO]