DATE : Nov 03, 2025

Iligan City — Isip kabahin sa mga lakang pang-andam batok sa posibleng landslide tungod sa padayon nga ulan, gipahigayon sa Barangay Disaster Risk Reduction and Management (BDRRM) Office sa Barangay Suarez ang pre-emptive evacuation sa pipila ka pamilya sa Iishai mga 12:00 AM November 4, 2025. 

Upat ka pamilya ang gi-evacuate daan, nga naglangkob sa siyam ka hamtong, siyam ka bata, ug usa ka senior citizen. Ang mga pamilya karon anaa na sa Barangay DRRM Office, nga gibuhat nga temporaryong evacuation center alang kanila. Ang maong lugar gikonsiderar nga landslide-prone area, maong dali nga miaksyon ang mga opisyal aron masiguro ang kaluwasan sa mga residente.

Ang mga opisyal sa barangay, uban sa Iligan City Disaster Risk Reduction and Management Office (CDRRMO), nagpadayon sa pagbantay sa kahimtang sa yuta ug sa mga pahibalo sa panahon. Gihatagan usab ug pagkaon ug ubang pangunang panginahanglan ang mga evacuees samtang ginahimo ang assessment kon kanus-a sila luwas nga makabalik sa ilang mga panimalay.

Gipasidaan usab sa mga opisyal ang mga residente sa kasikbit nga mga dapit nga delikado sa landslide nga magpabilin nga alerto ug maminaw sa mga pahibalo sa evacuation kon mu-escalate pa ang maong sitwayson. 

Ang maong lakang usa ka bahin sa padayon nga paningkamot sa siyudad aron unahon ang kaluwasan sa katawhan taliwala sa hulga sa Bagyong Tino.