Gibisita ni Mayor Freddie Siao ang City Hospital aron pagsusi sa kabag-uhan sa ospital. Kahinumduman nga ang City Hospital ang unang pasilidad sa LGU-Iligan nga iyang gibisita sa unang adlaw sa iyang paglingkod isip mayor aron makita ang kahimtang sa mga pasyente’g empleyado, ingon man mga kakulangon sa nag-inusarang pampublikong ospital.

Karun duna nay CT Scan ang ospital, nadugangan ang hemodialysis chairs, dunay idugang nga mga ultrasound machines, ug centralized ang oxygen system. Duna na say budget nga gigahin alang sa eye center diin makapacheck-up og makapa-opera sa mata ang mga pasyente.

Duna na sab cafeteria sulod sa ospital nga kakan-an sa mga watchers ug empleyado, ug gipanindot ang mga kwarto sa pasyente ug mga opisina. Ga-gamit na sab karun ang ospital og sistema diin computerized na ang pagprofile sa pasyente, pagrequest og tambal ug billing aron mapasayon ug mapadali ang proseso.

Duna sab 60 ka mga doktor nga nadugang sa tanang health facilities sa syudad ug planong dugangan pa. Mas limpyo ug komportable na ang ospital karun kumpara kaniadto, sumala sa mga pasyente.

Nahimo kini sulod lang sa kapin usa ka tuig pa nga administrasyon ni Mayor Siao ug Vice Mayor Dodong Alemania.