DATE : Dec 22, 2022

Gipahinumduman ni Mayor Frederick Siao ang mga ginikanan sa mayor’s scholar nga tutokan ang pag-eskwela sa ilang mga anak. Kahinumduman nga lakip sa mga kondisyon sa lokal nga kagamhanan ngadto sa mga iskolar ang pagmintinar og maayong grado ug paghuman sa ilang kurso. 

Sumala ni Mayor Siao, puhunan sa mga bata ang insakto nga edukasyon sa ila unya’ng pagpangita og trabaho. “Kung walay sakto nga edukasyon, dili ta ka-compete. Pasabot, kung high school level ka, ni-apply kag trabaho, kumpara sa college graduate, prayoridad pirmi ang college graduate. Asa paingon ang wala ka-graduate? Adto ra gyud sa trabaho nga dili kinahanglan mogamit sa ilang kahibalo,” sumala niya. 

Gi-dasig ni Mayor Siao ang mga ginikanan nga mahimong partner sa lokal nga kagamhanan sa paghimo’g dagha’ng college graduate sa Iligan. 

Buot sa mayor nga motaas ang lebel sa kahibalo sa kinatibuk-ang populasyon sa syudad. Ika-napulo sa iyang Iligan Development Goals ang edukasyon.

Gilambigit usab sa scholarship program sa lokal nga kagamahanan ang Public Employment Services Office (PESO). Kini aron magiyahan ang mga iskolar sa mga kurso nga maoy daghan oportunidad sa panarbaho ug kung asa sila mangempleyo human og eskwela. 

#AsensoIliganon