DATE : May 05, 2023

MGA MAG-UUMA SA DIGKILAAN GIDALHAN OG BINHI SA SERBISYONG ILIGANON CARAVAN

Gidalhan sa City Agriculturist’s Office ang mga mag-uuma sa barangay Digkilaan og organic fertilizer ug mga liso sa utanon atol sa Serbisyong Iliganon Caravan kagahapon. “Nalipay ko kay dili na mi moadto sa siyudad setenta pesos ang plete ug wala pay  apil sa PUJ,” matud sa mag-uuma nga si  Mancing Carnoso.

Sumala ni  Senior Agriculturist Wilfredo Golez  sa Organic Agriculture Section sa City Agriculturist Office, naghatag sab sila og mga binhi sa humay ug mais tungod dunay produksyon niini ang barangay. Lakip sa ipang serbisyo ang libre nga pagpagamit sa tractor. 

Samtang ang mga namuhi og baboy nga naapektuhan sa African Swine Fever kaniadto, nakadawat sab og ayuda pinaagi sa ilang buhatan hangtud nadeklara  nga ASF free ang barangay.

Mihatag sab ang City Environment and Natural Resources Office og mga similya sa  giant bamboo, durian, manga ug macopa sa mga residente. Gipang-apud-apod sab sa maong buhatan  ang fertilizer ug  compost material  nga isagol sa yuta aron motambok ang mga gitanom nga mga kahoy.

Gitabangan sab sa buhatan sa CENRO ang mga mo-apply ug permit  sa commercial Sand and Gravel ug uban nga mga serbisyo.

“Ang opisina namo magprovide ug  legal consultation  about solid waste management ug magdistribute og reading materials  about mga palisiya sa gobyerno, “ pamahayag ni Atty.  John Michael Badelles  sa  OIC Division Chief, Research, Planning and IEC, Monitoring and Enforcement, CENRO.

Ang Digkilaan usa sa mga hinterland barangays sa syudad diin panguma ug quarry ang nag-unang panginabuhian sa mga residente. 

[Ronnie Enderes/CIO]