DATE : May 06, 2023

Gi-siguro sa Local School Board (LSB) nga makadawat og proyekto ang 114 ka mga pampublikong tulunghaan sa Iligan. 

 Aron mahimo kini, gi implementar ang "One School, One Project" nga polisiya aron ma-apod ang pundo ug tabang ngadto sa mga eskwelahan.

Kini human nga mikabat sa 400 million pesos ang mga gipadala nga request gikan sa public school principal ngadto sa LSB apan 138 million pesos lang ang Special Education Fund (SEF) niini.

Ang giduso nga board resolution suportado sa kanhi Schools Division Superintendent nga si Dr. Roy Angelo Gazo. Malampuson nga na aprobahan kini niadtong Setyembre 2022.

Sumala ni Jennifer Densing ,  ang Officer In Charge sa Local School Board (LSB), nga mahikawan ang uban eskwelahan kung ibubo sa pipila lang ka eskwelahan ang tulo o upat ka proyekto.

Sa pagkaroon, ubos sa singkwenta porsyento (50%) ang mga principals nga nag request og proyekto.

Anaa sa lima (5) ka mga elementary ug unom (6) ka secondary public schools ang na aprobahan ug ongoing ang mga proyekto niini. Adunay sab tulo (3) ka proyekto sa mga public elementary schools nga gipadayon tungod wala pa kini nahuman sa miaging administrasyon ug gikumpleto niini na nga administrasyon. 

Proyekto kini sa lokal nga kagamhanan pinaagi sa Special Education Fund ( SEF ) gikan sa LSB .

[ Florita Mae Cagula/ CIO ]