DATE : Mar 03, 2026

Mo-printa og balik ang Philippine Statistics Authority (PSA) og National ID nga paper form alang sa mga nabahaan sa Iligan, sugod sa Marso 4, 2026, sa  gipahigayong Document Recovery Assistance Program (DRAP) sa LGU sa 3rd Floor, Robinsons Place Iligan.

Kini aron ma-ilisan ang nawagtang nga National ID o mga ID nga nadaut sa baha.

Pagklaro sa PSA nga paper form ilang mahatag, ug dili ang PVC o plastic cards apan balido gihapon kini ug ihatag nga libre. Kini aron dunay magamit ang mga IDPs sa ilang mga transaksyon.

Ang kolaborasyon sa PSA ug LGU-Iligan nahimong posible human sa pakigkita ni Armien Alorro, ang Head sa Iligan City Disaster Risk Reduction and Management Office, kang Brenda Lynn Castro, ang Officer-in-Charge sa PSA, ug Registration Officer III Paolo Angelo Lozano ganihang buntag.

Ang DRAP lima ka adlaw nga programa sa City Mayor’s Office nga gilangkuban sa City Civil Registrar’s Office, Office of the Senior Citizens Affairs Office, Persons with Disability Affairs Office, ug City Information Office. Gisugdan kini kaganihang buntag diin libreng mihatag og bag-ong ID ug booklet sa mga Senior Citizen, Persons with Disability, ug mga sertipikasyon gikan sa City Civil Registrar.