DATE :Feb 04, 2026

Midawat og dugang hygiene kit, family kit, kitchen kit, sleeping kit, food pack ug water container ang 102 ka pamilya nga nakalingkawas sa sunog sa barangay Saray. Gihatag ang mga kit Enero 3, 2026 sa barangay gym diin sila mi-evacuate.

Kini human mi-koordinar ang City Social Welfare and Development (CSWD) sa Department of Social Welfare and Development, ingon man ang Iligan City Disaster Risk Reduction and Management Office (ICDRRMO) ngadto sa Office of the Civil Defense (OCD) aron makakuha og dugang ayuda para sa mga nasunogan.

Sumala ni Mayor Frederick Siao, nahimong ingon niini kapaspas ang pagmobilize sa mga responders ug ayuda tungod gi-adapt sa LGU ang Incident Command System sa OCD. Ang ICS Ang Incident Command System usa ka on-scene, all-hazard incident management. Gasunod kini og usa ka istraktura, ug gipahapsay ang koordinasyon ug komunikasyon sa mga ahensya ug sektor atol sa pagresponde sa insidente.

“Tungod man ‘ni sa experience kada tuig nga dili lang sa Iligan, ang tibuok Pilipinas sige’g experience og kalamidad. Maong karung hitabua, automatically maka-react na dayun ang LGU. Unlike sa una nga panahon sa Sendong nga dili ingon ani kadali,” sumala sa Mayor.

Sumala sab ni Mayor Siao, dunay planong dugangan ang mobile kitchen sa ICDRRMO. Ang mobile kitchen usa ka madala-dala nga kusina nga gigamit aron magluto ug maghatag og init nga pagkaon direkta sa lugar nga nanginahanglan, labi na panahon sa kalamidad o emergency.

Dugang niya, dunay pinansyal nga tabang sab nga madawat ang mga nakalingkawas sa sunog gikan sa opisina sa mayor apan kinahanglan mosunod kini sa tukmang proseso ug mosumiter sa gikinahanglang requirements. 

Atol sa relief distribution, mitambong sab si Armien Alorro kinsa Head sa ICDRRMO, Sander Bughaw kinsa Warning and Operations Section Chief sa ICDRRMO, Evelyn Madrio kinsa Head sa CSWD, DILG Director Ma. Maida Daniot, ug Saray Punong Barangay Nietzsche Largo.